قطعه فحم بالكريمه

صحتين وهنا

إنه فى يوم الجمعه الموافق الخامس من شهر اكتوبر الثالث والعشرين من شهر رمضان., قررنا نحن محمود منصور دخول المطبخ لعمل كيكه إسفنجيه ., نبدأ الحكايه حيث كنت فى يوم من الأيام عند صديقى العزيز شريف الجندى كالعاده بنقل برامج للكمبيوتر الخاص بى ., وإحنا بننقل بعض البرامج ....!, جذب انتباهنا برنامج لذيذ أوى.,أسمه " المطبخ المصرى " . قولنا فى صوت واحد المطبخ المصرى من أسمه يعنى بيتكلم عن وصفات الاكل وطريقه عملها ., إشى محمر وإشى خضار وإشى حلويات , المهم أخدت البرنامج وأعدت أفتش عن أكله ممكن أعرف أعملها , فبدأت بالحلويات وبالاخص طريقه عمل الكيكه فتحت صفحه الكيكه واللى كان اسمها " كيكه إسفنجيه " . المهم حضرت المقادير دقيق وسكر والذى منه , وبقيت عامل ذى اللى هيصنع المستحيل رايح عند البقال وجاى من عند البقال ومن المطبخ للكمبيوتر ومن الكمبيوتر للمطبخ المهم فى الاخر جهزت كل حاجه وأخدت الليله دى كلها ودخلت وقفلت على نفسى ,, آآل أيه الواد هيخترع كيكه جديده محدش عملها...,و طبعا إنتوا متخيلينى وأنا ماسك مضرب البيض والدقيق وبقيه المكونات ومنسجم أوى باللى بيحصل ,, المهم مطولش عليكم خلصت الاختراع ده بصعوبه . وبعدين قولت أروح أجيب صينيه وأحط فيها العجينه الغريبه الشكل دى, واللى ملهاش ملامح بالمره إنها هتطلع كيكه فى الاخر , المهم دخلت الصينيه الفرن وشغلته وظبط كل حاجه تمام التمام . المشكله كانت أنا أمتى هطلع الكيكه من الفرن , رجعت للكمبيوتر علشان أشوف الوقت المطلوب أيه , لقيته من أربعين لخمس وأربعين دقيقه , لأ والمشكله الأكبر أنه بيقول ملاحظه ممنوع فتح الفرن إلا بعد مرور ربع ساعه . قلت ألتزم بالتعليمات وما أفتحش الفرن......., وبعد مرور عشر دقائق قولت أطمن بئى على الاختراع بتاعى وفتحت الفرن وبسم الله ما شاء الله الصينيه كانت على آخرها والكيكه زى الفل واسفنجيه تاكل صوابعك وراها وبعدين قفلت الفرن زى ما الكتاب بيقول وياريتنى ما قفلته فبعد مرور تلت ساعه بفتح الفرن وخير اللهم أجعله خير لقيت قطعه فحم والصينيه ما بئتش صينيه والكيكه اللى كانت منفوشه فى الصينيه أصبح سمكها 1سم ونص وحالتها بالبلا ..لأ وقال أيه عامله شويه تضاريس فى الصينيه ارتفاعات ايه ومنحدرات ايه وهضاب بئى وهيصه ..... المهم قفلت الفرن وأخدت الصينيه إنى أعرف أفصل الكيكه ( أقصد قطعه الفحم ) دى من الصينيه لكن مستحيل المهم بعد محاولات صعبه قدرت أفصلهم عن بعضهم طبعا الكيكه رميتها لكن الصينيه ما بين الحياه والموت .ودى كانت أول وآخر كيكه هعملها فى حياتى ................,Waiting for more adventure………….. To be continue